雲貴川 (佐敦)

在佐敦南京街的雲貴川,店子很小,這夜全場爆滿,其實坐十二三個,已經可以叫爆場.我們一行四人,坐得很擠逼.但她們的川味,又會令人心甘情願去逼餐死.

月前來吃過很好吃的皮蛋,口水雞,是夜再吃,味道依然.雞肉仍嬌嫩無比,麻辣味香兼刺激,皮蛋的溏心加辣油又是令人難以抗拒.水煮牛肉辣度夠,只嫌牛肉比梳打粉塗得太厚.

一人自己吃一碗粉,我同上次一樣要紅薯粉.營養價值高,好過吃米線.配料要腩肉同豆卜,腩肉肥位爽瘦位鬆化.豆卜是用來索湯汁.這夜的湯底要中麻辣,吃得刺激,本來不叫飲品,後來也抵不住要杯凍檸茶,幾塊錢實在不能省.

沒有早前在四陂坊雲貴川,吃到變烈焰紅唇,今次的程度也不弱.

越夜越有機,吃到越軌也不收制,不須要有原因,只需要紅唇的吻.身邊的靚女友人聽罷,即刻嚇到擰轉頭....

青葉日本料理 (日式放題) (觀塘)

考試早放，第一次試青葉~

裝修不錯，感覺頗似正宗的日本餐廳

看看menu，種類都頗多，價錢亦不算太貴!
點了一個 lunch set 鹽燒魷魚+麵豉湯+沙律+甜品+飯+飲品(要了凍奶茶)
waitress說魷魚要等十分鐘左右，所以朋友的拉麵比我早到
拉麵lunch set 有兩件壽司卷(頗薄)+甜品+拉麵+飲品

奶茶很快捧來了。啜一口，不算滑，但有很濃的茶味，很滿意
後來 鹽燒魷魚來了~ 很香很香的燒魷魚，一大碗裝得很實的珍珠米飯，一碗麵豉湯(內有少量蔬菜)、沙律(幾片生菜青瓜+醬汁)及甜品，還有一小碗甜醬油/鼓油

燒魷魚打豎切成剛可放進口的寬度，一圈圈的，軟硬方面還可，不過確實很香，全條都吃光光了~算是不錯
飯很多，拌了甜醬油吃，但由於先用了湯和沙律，浪費了半碗飯
雖然這lunch set很簡單，卻是我一直想吃到的，味道不太濃，感覺較健康嘛~所以很喜歡~

重頭戲來了!
甜品是一顆貌似迷你煎堆的球狀，紅豆蓉餡(4粒 $18)
其貌不揚，味道就....朋友咬了一口，露出一副無奈的表情
看看旁邊一桌男生，不知為何爭奪完這些一顆顆的東西後吃完在笑
同桌另一個朋友嘗後，comment是「吃了很想笑」
...........難道它是笑口棗?!



頗超值，味道不差
下次應該會再光顧
...
鹽燒魷魚lunch set $38(折後31)
拉麵lunch set $36(折後$29)
穿校服者有八折
午市免加一

赤丸製麵所 (將軍澳)

新開無耐, 日日放工返到商場都見有人排隊, 心諗都應該唔差掛...於是星期三夜晚七點左右, 放工去試吓.

點咗天婦羅甜薯, 燒汁豚肉飯+迷你天婦羅烏冬, 牛肉烏冬. 當燒汁豚肉飯上枱, 我非常疑惑, 從未見過咁乾憎憎, 飯無汁色的"燒汁豚肉飯". 問侍應小姐係咪叔落漏咗燒汁, 佢話啲燒汁係透明的!!!!（我諗我都係透明的．．．）然後佢答應另上一碟燒汁.

結果, 攞黎一碟極稀, 似豉油加熟油的醬油話係燒汁, 我真係無話可說. 豚肉味道一般. 迷你烏冬跟一隻天婦羅炸蝦, 烏冬可以, 天婦羅炸蝦一般.

至於牛肉烏冬, 烏冬無問題, 牛肉就吉野家都好過佢. 天婦羅甜薯, 甜薯一啲都唔甜.

坐對面的小姐點咗燒汁牛肉烏冬, 烏冬上枱時, 佢亦係一臉疑惑. (燒汁去哪?)

食店有免費清水供應, 不過連最普通的"無料"綠茶都欠奉.

總結, 唔會再試下次.

瑞士餐廳 (尖沙咀)

今日虎虎同小熊同小虎同小小熊四隻出街食飯 ....
原本想食萬豚屋 ..... 搵左一輪原來係正瑞士餐廳對面 .... 但好多人排隊 ....
咁就走去瑞士餐廳睇睇 ..... 應該仲係早 .... 所以可以即刻入 ...
入到去睇下個 Menu 就決定左揀農夫芝士火煱配雞粒 ....
再加多個普通既扒餐 .....
個芝士火煱其實唔算好特別 ..... 有小小酒香 .... 但同意粉屋真係差不多 .....
但佢既包應該無限供應 .... 但食唔到咁多 .....
跟住個扒餐返而有特別 .... 小熊切比小虎同小小熊食既時候發覺塊豬扒中間原來係 D 溶左既芝士 ..... 咁整法都幾考心思 ..... 不錯 ......
味道都唔差 .......
整體來講野食唔算好特別 ..... 應該試一次者 .......
同埋唔知係咪未到旺場時間 .... 好似無麥開冷氣咁 .... 幾焗下 .....

P.S.: 佢既服務真係幾好 .... 但剩飲水都要收 10 蚊 .....

甜蜜蜜甜品專門店 (尖沙咀)

今天去了尖沙咀Shopping, 到了這家食午餐！


Set Lunch (包一杯熱飲, 凍飲加HKD2.00 + 一款精選/是日甜品)

羊扒飯很好食！
焗雜菌海鮮飯，OK啦！
雜果凍豆腐花,　很不錯幾好味！

總括：
抵食，味道不錯，不過環境比較迫！

b420 Coffee House (葵涌)

o係金龍返左咁耐工，
終於唔駛過葵芳新都會就有得飲Mocha同Latte呢類咖啡。
講真d款味仲要多過Starbucks Pacific多多聲，
至現時為止試過以下幾款：

薄荷Mocha　<------真係一流
云呢拿Mocha　 <-------朱古力味重左ｄ，雲呢拿味唔係太覺，但都好味
愛爾蘭　<-------適合喜歡奶味的朋友

睇餐牌仲有好多款味，例如焦糖、榛子等等，
什至有ｏ係Starbucks都搵唔到既椰香味同埋唔知咩杏香酒味，
不過我仲未試

三希樓 (滿江紅) (中環)

以前在波斯富街的"滿江紅",已一早搬上去半山科達中心.身價三級跳,並改名為三希樓.這天在此午市,難得亦有幾位朋友上山相伴.

時間早到很多,忘了買報紙,唯有吃住兩道跟茶上的前菜,吃住等.四川小泡罈的辣椒,果然有勁度.順便一提,此店的茶壺,同萬麗酒店滿福樓一樣,同樣是茶壺放在火爐上,用火來保持溫度.

中午吃的是點心為主,你亦可叫主菜.點心有粵希和川希,雖然到川菜館,吃粵菜是有點怪.但見到有豬潤燒賣供應,又忍不住先來.豬潤厚切,吃落很爽,味道鮮,燒賣有肉汁.另一味點心紅油抄手,抄手皮薄餡靚,而炸過的荵粒,搭上辣油吃得更滋味.剁碎蒸魚雲不算很辣,但越吃越刺激.蒜泥白肉的蒜泥中間一劈,吃時才自己動手去撈.風味反不及坐街邊的聯記川王.口水雞是每一次吃川菜也會吃的一味.三希樓用的雞是鮮雞,雞皮爽滑有彈性,紅油下的雞肉仍不失雞味,而雞肉嬌嫩可口,辣味麻香濃厚.收這個價錢,是應有的水準.

毛血旺用料足,除豬紅之外,同煲亦有鱔,柏葉,豬喉嚨等等,份量十足,麻香誘人,雖然在餐牌上的毛血旺,名字旁邊附上三隻辣椒,但不算特別辣.我不是大辣之人,也接受到.另一味爆腰花,豬腰爽口帶鮮味,如果豬腰處理不宜,就會有一陣異味,三希樓作為高級川菜館,又豈能被個腰花難到?

後來友人陸續來到,有人喉嚨不適,不能受到川菜的辣,盡叫些港式點心如腸粉,蝦餃之類.一籠蝦餃有五粒,細細粒容易食.腸粉都做得晶瑩通透.

另一友人的辣擔擔麵,小弟只喝其湯,麻醬香味濃郁,辣味反而不顯彰.

既然身在半山,五個人午市埋單七百多,也是差不多.年前來過同大廈,現已結業的樂意居,是一個例子.

待遲一點,再召集一班朋友來晚飯.餐牌上的一味豬腦鍋,就是我會再來的原因.

北京酒樓 (佐敦)

第一次幫襯北京酒樓, 其實係 係月頭,
但就唔記得咗寫食評, 等我今日補返先!!

去之前已經上黎呢度睇下 d 食評,
通常都係比人話趕客, 服務油麻地,
由於我地係要去慶生日, 所以一個禮拜前已經卜位, 同埋講明會帶個蛋糕去食,
同埋問佢定佢會唔會趕我走, 佢地就話我果日係平日, 會好 d ge..............

當日係禮拜三, 我地五個人去, 上去之前都有 d 擔心, 因為怕無位,
因為我覺得果訂枱過程有少少兒嬉!
但好彩上一到去就已經有位, 我地卜左七點半, 三個人先上, 另外兩位過多十拎分鐘先到,
咁佢地都無話要我地人齊先比枱我地, 坐正係近門口 ge 中間!!

雖然我地只係得五個人, 但只係見到佢有六人餐, 咁六人餐就六人餐, 六人餐都有唔知三款定兩款, 只係記得有一款就 1150, 另一款就七百幾蚊, 分別係無咗個雞飽次囉, 但我地怕六人餐會食唔哂, 所以叫左個七百幾蚊果個, 咁樣就算食唔哂都無咁肉痛嘛!!

內容有: 雞絲粉皮, 賽螃蟹, 北京填鴨, 宮爆明蝦, 雲吞雞, 時菜, 小龍飽同甜品,

一叫完, 轉個頭個粉皮已經黎到, 都未黎得切影相, 個伙計已經好快手咁同你撈醬, 食到一半, 個賽螃蟹都到埋, 又係好快手咁同你撈醋, 果種感覺, 就好似嫌你姐手姐腳, 咪咪磨磨咁, 姐係叫你快手 d 呀!!

咁可能上去之前已經有左心理準備, 所以無乜野, 佢有佢地係度快, 我有我地係度普通速度咁食, 原先老豆仲問我地洗唔洗叫飯, 我正刻阻止佢, 因為我知填鴨果度一定會有好多薄餅, 實會好飽, 所以唔比老豆叫飯!!

蘇花我地繼續食落去, 佢都無話比面色我地睇, 可能我地無留意啩, 同埋大佬話可能我地係平日, 所以無咁趕客, 但不過我地剛到 ge 時候, 後面果枱的確係比佢地趕走, 但係好有禮貌果隻, 因為後面果枱似 d 生意佬, 幾個中年男人, 食淨一枱都係野, 佢地就問佢地仲食唔食, 唔食就同佢地埋埋張單, 事關好多人等位, 的確, 當我地坐好之後, 門口一直都有好多人等位, 唔知佢地有冇訂位, 但終於佢無攪到我地就得嘞!!

佢上完個甜品之後, 就同我地講話上埋我地個蛋糕................好呀!!
我地帶個蛋糕黎, 佢地都無話黑面, 佢地就咁原盒放底左之后就走, 由得我地自己攪掂.

食到大約十點鐘左右我地就走人, 咁一餐飯, 食個半至兩粒鐘都好正路, 我地仲要食埋蛋糕, 同埋吹咗一陣水, 總括黎講都算係咁!!

整體黎講, 樣樣野都不過不失, 唔算係超好味, 咁以呢個價錢, 我覺得可接受, 再去食都會, 食佢 ge 懷舊風味, 入到去呀, 真係好似返左去七八十年代咁嫁 !!

唯一趕客 ge, 真係佢個所謂甜品, 唔食一 d 都唔可惜,
雲吞雞都好味, 小龍飽呢.......................人地唔係靠佢地賺錢,
唔可口, 我覺得可接受!!

其實我有影到相嫁, 但由於 file 太大, 唔識整細, 所以................
sorry, 分享唔到!!

龍門客棧 (沙田)

繼河夢、月光光之後，這次的目的地，是這間主打淮揚菜之龍門客棧....

店子名稱很有江湖意味，但裝修卻是十分的高貴典雅，古味盎然。當然價錢也是眾麗豪餐廳之最la...

偕同太座及友人一家，可以叫多幾味來吃吃，也是樂事一樁...

前菜來個烤麩及燻魚是例牌動作。這裏的烤麩弄得碎濕濕的，很有手掰的味道，而且味極甜極濃，頗對小弟口味。但很奇怪的是，吃上口是熱辣辣的，感覺很怪；燻魚吃不出甚麽"燻"味，卻只是一味死甜。跟烤麩相反，這個卻是凍冰冰的，奇怪

葱爆牛肉也是在水準以下，關鍵是那個被梳打蹂躪得體無完膚的牛肉....

火腿津白普普通通；粗炒不夠油也不夠甜，可幸麵條已上哂色，還吃得過.....

小籠包內的湯汁是足，但肉不算特別鮮。湯雖多，又有何用 ?

生煎包底不算煎得很脆，肉也是跟小籠包的一樣是不太夠鮮，是一個不太合格的製成品....

環境佳，服務也算貼身，但食物卻是平平無奇。七五折後還要每人百五大洋，就自己來說，是有點不太值了...

無名炭爐雞蛋仔 (牛頭角)

第1次去 試左雞蛋仔
我覺得甜左少少 不過好香好有風味
雖然唔係新鮮整既 但係都仲有少少暖意
等緊朋友果底果時 講起我唔鐘意食軟林林既格仔餅
老闆叫我下次去同佢講要脆啲 好貼心
十蚊1底 我覺得幾值

第2次去 食左格仔餅
老闆見我地2個去買1個格仔餅
幫我地分開左2個細紙袋裝 ;)
叫左老闆脆啲 真係好好味
因為即整 所以拎上手熱騰騰
糖入面好似有椰絲 好好味

我覺得格仔餅好味過雞蛋仔好多 ;)
可惜下邨就黎拆 >< 要食就快啲去食多啲

壽司正 (尖沙咀)

之前已經見到壽司正有90分鐘任食火煱供應.
有2個價錢.
1個係$130,另1個係$240.
X同我揀左130個款.
因為我覺得兩個人打邊爐食5百幾6百又好似唔太值...

入到去係坐迴轉位.
2個人1個爐.
迴轉帶上面除左有壽司頌有唔同既火煱配料.
有魚彈,牛丸,墨魚丸,娃娃菜,小唐菜,烏冬,金菇,芋絲,蘿白,蟹柳,豆卜
任你拎.

兩種湯底選擇,
昆布同埋豆乳.
我地叫左豆乳.
味道都幾濃郁.但我諗未必個個人都中意.

牛肉黎啦.
因為係即叫即切,所以每碟牛肉既賣相都唔1樣.
有D太碎啦.
我本人覺得牛肉唔夠肥美.
脂肪比例多番少少會更好.
牛肉味亦唔特別出眾.
我見人地食$240個隻就比較肥.
碟碟牛肉都比較平均.

而且當晚係十分爆場.
叫所有野都需時.
所以建議大家食完1碟就好叫定下2碟.
如果唔係好易斷纜...
但侍應都算好有禮貌

我地叫埋可樂同波子汽水.
食左10碟牛肉.
最後埋單都唔洗3百.
OK啦.

美心西餅 (上水)

同學仔生日，因為大家都是愛美之人，所以買蛋糕都不想買那些高卡的款式。知道美心最近新出了天使蛋糕，看過食評不錯，我當然極力推介新品呢！

這個一磅半左右的天使蛋糕，沒有廣告中的平滑，賣相甚至有點醜陋。平平無奇，白雪雪的，初看真的有點失望。不過知道還有方法使它變得有點生氣，那就是為它撒下魔法。壽星女很好人地把這重要的任務交了給我，我把魔法脆脆打開，少少，少少的為蛋糕施下一個個祝福的魔法。直到脆脆都撒滿了蛋糕的面，我滿意地笑了笑，為天使插上生牌。燭光一起，我們全場響起生日歌，壽星女的第一刀後，我為她效勞分成12份。

哈哈，終於試到天使蛋糕了，我當然私心地選了一件大件的。入口的忌廉雖沒有想像中的軟滑，甚於天使蛋糕的關係，氣孔比一般的大，幸好蛋糕還是軟綿綿的。不知是否自己所施的魔法關係，不會過甜的蛋糕配上脆脆，我吃得很是滋味。中間的忌廉還點像焦糖和咖啡的味。

因為要回校的原因，蛋糕成為了我們這天旅行日的早餐。比起惡魔cheese cake，輕盈的天使在今天更得我歡心。皆因一件半過後，我還能保留十足的戰鬥力去西貢ＢＢＱ

飽點王子 (旺角)

近年市面多左好多間中式包點舖，提供好多熱騰騰的包類，即買即吃；又或者，可以買凍的，回家自行再蒸熱食。

最近行開旺角花園街，經過lee間包點王子，見有d餓，就買左隻芝麻包食!
嘩，個包皮厚度適中，芝麻饀好足料，甜度可以，芝麻饀咬落很有口感，真係好正!
亦好啱近日轉涼的天氣，嘆番個熱包，都只係幾蚊雞!
好味飽肚又暖胃，仲非常適合近排慳得一蚊得一蚊的市道。

註﹕芝麻包要頗餓才好買來吃，因為其實都幾漏架!

竹八日本料理 (銅鑼灣)

今日約咗朋友食日本菜，本來去試另一間日本餐廳，不過full晒，所以去咗竹八。不過亦無損失，因為竹八平靚正，而且又容易有位。12:00book 12:30都無問題，12:40到得三枱有人，1:15走都仲有吉枱。

竹八有好多lunch set，其中我最鍾意二重揍餐，有沙律、蒸蛋、兩樣主食(今次我揀咗鰻魚飯、吞拿魚腩蓉飯，朋友揀咗切角魚生粒飯、油甘魚飯)、咖啡。

沙律 - 有菜、蕃茄，不過太涷，d菜雪到有d結冰
蒸蛋 - 入面有白果、日式魚蛋、冬菇，好滑、暖暖地，好好味
鰻魚飯 - 鰻魚燒到暖暖地，個汁甜甜地再加紫菜絲，好正
吞拿魚腩蓉飯 - 今日個味淡d，不過好新鮮
切角魚生粒飯 - 主要有吞拿魚、三文魚、油甘魚、青瓜、蟹子，細細粒，ok新鮮
油甘魚飯 - 有五片，新鮮!
咖啡 - 個size好似一杯espresso，有拖肥味架! (其實可以楝雪糕，不過好飽食唔落，所以楝咗 咖啡)

Services唔錯，自動加水、收野。

大眾粥麵 (北角)

11月21號 - 下午一點前

之前行過好多次馬寶道街市, 但是看不到&不留意裡面有間粥鋪。 直至到今日就決定試試他們的飯la。 好緊張la。

坐下來就叫左個細梅菜肉餅飯(HK$15,-)。 來到就即刻試。 個肉餅好軟, 但是好好味。下次可以整碎它, 然後撈埋D飯食。 可能仲好食。

之後叫左個炸兩 (HK$7,-) 食。 不過覺得個油炸鬼不夠脆。 不算好吃。

個環境都可以接受。 不是好大的地方。 但是都坐得舒服。 但是有D美中不足是D炒麵&炒米沒有蓋蓋著。 不算衛生。 服務方面就好。 因為我沒有叫野飲。 個姐姐就比左杯水我。 真係覺得好熱情。